திருச்சியில் கிரடாய் சார்பில் அடுக்குமாடி குடியிருப்புகள், தனி வீடுகள் மற்றும் வீட்டுமனைகள் தொடர்பான பேர்புரோ – 2026 விற்பனை கண்காட்சி இன்று தொடங்கியது. திருச்சி கலையரங்கம் திருமண மண்டபத்தில் நடைபெற்று வரும் இந்தக் கண்காட்சி, நாளை மறுநாள் வரை தொடர்ந்து 3 நாட்கள் நடைபெறுகிறது.

கண்காட்சியின் தொடக்க நிகழ்ச்சியில் அமைச்சர் ரமேஷ் கலந்து கொண்டு கண்காட்சியைத் தொடங்கி வைத்து அரங்குகளை பார்வையிட்டார். மேலும் இந்த நிகழ்வில் மணப்பாறை சட்டமன்ற உறுப்பினர் கதிரவன், திருச்சி கிரடாய் சேர்மன் மனோகரன், கிரடாய் தலைவர் நசுருதீன், செயலாளர் முகமது இப்ராஹிம், பொருளாளர் கார்த்திக், பேர்புரோ கண்காட்சி சேர்மன் இளமுருகன், கண்காட்சி செயலாளர் அலாவுதீன், தமிழ்நாடு கிரடாய் துணைத்தலைவர் கோபிநாதன் உள்பட பலர் கலந்து கொண்டனர்.

மேலும், ஸ்டேட் பேங்க் சென்னை சர்க்கிள் பொது மேலாளர் சஞ்சீவ் குமார், துணைப் பொது மேலாளர் சந்தீப் குமார் நாயக், பஞ்சாப் நேஷனல் வங்கி அதிகாரி ராஜ்குமார், எச்டிஎப்சி வங்கி சார்பில் பாலமுரளி கிருஷ்ணன் சின்கா உள்ளிட்ட பலரும் பங்கேற்றனர்.

இந்தக் கண்காட்சியில் கட்டுமானத் துறையைச் சேர்ந்த நிறுவனங்கள், உள் அலங்கார நிறுவனங்கள் மற்றும் கட்டுமானப் பொருட்கள் விற்பனை நிறுவனங்கள் என மொத்தம் 48 அரங்குகள் அமைக்கப்பட்டுள்ளன. இதில் 32 கட்டுமான நிறுவனங்களும் இடம்பெற்றுள்ளன. பாரத ஸ்டேட் வங்கி, இந்தியன் வங்கி, பஞ்சாப் நேஷனல் வங்கி, எச்டிஎப்சி வங்கி உள்ளிட்ட வங்கிகளும் அரங்குகளை அமைத்துள்ளன.

வீடு வாங்க விரும்புவோருக்கு வீட்டுக் கடன் தொடர்பான தகவல்கள், நிதி ஆலோசனைகள் உள்ளிட்ட சேவைகளும் கண்காட்சியில் வழங்கப்படுகின்றன.

மேலும், ரூ.30 லட்சம் முதல் ரூ.6 கோடி வரையிலான தனி வீடுகள், அடுக்குமாடி குடியிருப்புகள் மற்றும் வீட்டுமனைகள் கண்காட்சியில் காட்சிப்படுத்தப்பட்டுள்ளன. கட்டுமான நிறுவனங்கள் மற்றும் உள் அலங்கார நிறுவனங்கள் சார்பில் பல்வேறு சிறப்பு சலுகைகளும் அறிவிக்கப்பட்டுள்ளதால், கண்காட்சிக்கு வரும் பொதுமக்களின் கவனத்தை அவை ஈர்த்துள்ளன.

நிகழ்ச்சியில் ஆலோசகர் ரவி, இணைச் செயலாளர் முருகானந்தம், பொருளாளர் கார்த்திக் உள்ளிட்ட கிரடாய் நிர்வாகிகள் மற்றும் பலர் கலந்து கொண்டனர்.